Համաշխարհային տնտեսության վստահ և հավասարակշռված վերականգնումը պահանջում է միջազգային հանրության համակարգված գործողություններ, այդ թվում՝ երիտասարդության շրջանում գործազրկության դեմ պայքար: Այս մասին հայտարարել է ՄԱԿ-ի գլխավոր քարտուղար Պան Գի Մունը՝ փոխանցում է TASS-ը:

Ելույթ ունենալով ՄԱԿ-ի տնտեսական և սոցիալական խորհրդի հատուկ նիստում՝ նա կոչ է արել ապահովել «կայուն զարգացման ֆինանսավորման արդյունավետ և կանխատեսելի մեխանիզմներ»:

Առաջին հերթին Պան Գի Մունը կոչ է արել «պարզել և վերացնել երիտասարդության շրջանում գործազրկության բարձր մակարդակի բուն պատճառները, որը լայնորեն տարածված է շատ երկրներում», ինչպես նաև աշխատանքի ընդունելիս վերացնել գենդերային անհավասարությունը: ՄԱԿ-ի գլխավոր քարտուղարը նաև զգուշացրել է՝ թեև երկրների կայուն տնտեսությունն անհրաժեշտություն է, բայց չի կարող ինքնին երաշխավորել մարդկության կայուն զարգացումը:

«Մենք կայուն զարգացման համար պետք է ապահովենք ռեսուրսների հասանելիություն բոլոր մակարդակներում՝ ազգային, միջազգային, հասարակական և մասնավոր»,- նշել է նա: