Հայաստանի ազգային վիճակագրական ծառայությունը (ԱՎԾ) տեղեկություններ է հրապարակել ընթացիկ տարվա հունվարի միջին ամսական նոմինալ աշխատավարձի վերաբերյալ: Գաղտնիք չէ, որ մեր քաղաքացիներից շատերը կասկածում են ԱՎԾ հրապարակած բացարձակ ցուցիչների արժանահավատությանը: Այլ հարց է աշխատավարձերի հարաբերակցությունը՝ ըստ աշխարհագրության, ինչը քիչ թե շատ արտացոլում է այդ ոլորտի իրական պատկերը:

Ստորեւ բերված գրաֆիկում ներկայացված է մայրաքաղաքի տարբեր վարչական շրջաններում միջին աշխատավարձերի հարաբերակցությունը քաղաքի ընդհանուր ցուցանիշի նկատմամբ:

Հարկ է նշել, որ կոնկրետ շրջանի միջին աշխատավարձը որոշվում է այդ տարածքում գտնվող կազմակերպությունների հաշվետվություններով:

Ամենաբարձր աշխատավարձը, որը 13%-ով գերազանցում է քաղաքի միջին ցուցանիշը, Կենտրոն վարչական շրջանում է: Այս շրջանում են կենտրոնացված իշխանության բարձրագույն մարմինները, գրեթե բոլոր նախարարություններն ու պետական խոշոր գերատեսչությունները, պետական բուհերը, եւ այլն:

Երկրորդն այս ցուցանիշով Քանաքեռ-Զեյթուն վարչական շրջանն է, որտեղ միջին աշխատավարձը քաղաքի ընդհանուր ցուցանիշը գերազանցում է 8%-ով: Ինչ վերաբերում է մայրաքաղաքի մյուս վարչական շրջաններին, ապա այստեղ միջին աշխատավարձն ավելի ցածր է քաղաքի ընդհանուր ցուցանիշից: Ամենացածր աշխաավարձը գրանցվել է Դավիթաշենում, որտեղ միջին աշխատավարձը կազմում է քաղաքի ընդհանուր միջին ցուցանիշի 67 տոկոսը: